Apnakarachi Submissions

kamyabi kiya hay?

Owner: humara_malik
Hits: 269
Votes: 3
Rating: 4.66
Created: 2008-03-13 21:33:19

Submit review Recommend Contact Owner Report Owner's listing

Rating

3 votes

Favoured:

Kamyabi kiya hay?????

Kuch paa lene? Hasil ker lena? Mil jana? Jeet lena? Ya phir kabhi kabhi cheen lena. Kiya yehi hay kamyabi?
Kamyabi ki ye tamam suratain aik bohat bary sawal ki shakal mein mery samny mojood hain aur mera ye aam faham dimag iss bat per mutafiq nahi ho pa raha ke kiya kamyabi ki mandarja- bala ashkal hi hakeeki kamyabi ka mud’daa sunati hain?
Ager kuch der ke liye farz ker liya jaye ke aik aam admi apni zindagi ka aik bara hissa kisi hadaf ke hasool ke liye koshaan rehta hay aur anthak mehnat ke baad usse wo hadaf mil bhi jata hay ya aam istilah mein wo ‘kamyab’ ho jata hay to baki zindagi ab wo kiya kary ga? Jab uss ki mehnat usse aik kinary tak lay hi ayi hay to ab mazeed mehnat, justajo, lagan aur koshish jese tamam alfaz ka to khatma ho gaya jo ke kisi bhi insane ki zindagi ka nasbul-ain hone aur rehny chahiye hain.
Bus ye hi iss nacheez ke dimag ka fatoor hay jo kamyabi samajhny se kasir hay.

Insane ki zindagi mein peda hony wali tarap usse be-chain rakhti hay aur ye hi be-cheni naye naye rastoon aur nai nai manziloon ka ta’ayun kerti hay kiyoon ke main samajhti hoon ‘sukoon maut hay’. Issi liye ager dukh, takleef, pareshani aur be-cheni wagera zindagi se khatam ho jain ge to shayad jeeny aur aage berhny ka maksad bhi faut ho jaye. Insane kunwe ka mendak ban ker reh jaye ga aur usse naye tajurbat se har kisam ki dilchaspi khatam ho jaye gi.
Jeet insane ko sust aur kahil bana deti hay jabke haar kisi naye zawiye se soochny ke liye chust aur bahimmat. Zindagi mein milny wali choti choti fatoohat bary bary azaim ki taraf ragib kerti hain aur bari bari haar naye ahdaf ki talash sikhati hain. Bari bari khushiiyan khud mein magan ker ke hamari tamam tar tawanai choos leti hain aur hum uss bari khushi ko sanbhalny mein hi apni tamam tar tawanai zaya ker dety hain aur phir kisi aur joogy nahi rehty.

Kabily gaur baat ye hay ke kamyabi koi ashya ka dheer nahi ho sakti ke jis per hum barajman ho ker apni jeet ka jashan manatee rahain kiyoon ke aik khass wakt ke baad her hasil shuda cheez bewuk’kat ho jati hay. Kamyabi wo rasta hay, wo hikmat e amli hay, wo tarakeeb hain jo hum ashiya ke hasool ke liye seekhty hain aur har bar un mein tarameem kerty rehty hian. Ye hi tarameem umar ke sath sath tajurba kehlane lagti hain.

Asal mein ashiya ka milna ya na milna ye sub to Khuday e Buzurgo Bartar ke hath mein hay. Is liye meri nakis raye mein humain sirf apne raste per tawaja markooz rakhni chahiye ye hi hamare liye kamtabi ho gi kiyoon ke ashraful-makhlookat hone ke nate hum mehnat kerny ki zimmedari to sath laye hain mager ne’amatoon ka hasool hamary ikhtiyarat ki zad mein nahi aata wo sirf sur sirf uss ma’abood e barhak ka fazal hi ho sakta hay hum per. To uss ke fazal ke yakeen aur koshish shart ke sath kamyabi ka mafhoom zahan nasheen ker ke Allah ki madad aur rehnumai talab kerty hain ke wo hum sub ko kamyab kary iss dunya mein bhi aur aakhirat mein bhi.
Ameen

Reviews (1)